CAGAYAN DE ORO CITY-Doble-alerto karon ang tanang sakop sa Cagayan de Oro City Police Office. Kini tungod sa posibleng pag-atake sa mga sakop sa NPA sa hinterland barangays ning syudad.
Gibutyag ni C/Insp Mardy Hortillosa, tigpamaba sa COCPO nga dili lang usa apang duha hangtud sa tolo ka barangay ang ilang gitutukan sa pagkakaron.
Kini nunot sa posibilidad nga dali makasulod ang mga sakop sa rebelde tungod kay anaa man kini naka-posisyon nga mga barangay sa bukirang bahin.
Dali ra usab ang posibilidad nga makapanghaylo sila sa daghang mga bag-ong recruit nga mupalig-on sa puwersa sa wala.
Gani, duha ka anggulo ang gitutukan sa mga kapulisan karon, usa niini ang recruitment ug extortion activities sa NPA.
Samtang,imbis 200, anaa lamang sa kapin 50 ang ihap sa mga mi-atakeng sakop sa New Peoples Army kon NPA sa Brgy Nangcaon, Opol Misamis Oriental.
Subay sa ulahing report ni 4th ID,Philippine Army spokesperson Capt Joe Patrick Martinez, nagpadayon ang pagpatrolya sa tropa sa 58th IB sa maong lugar.
Una niini, ilang gihupay ang gibating kalisang sa mga residente nga nanghikling gikan sa kapin kon kulang 10 ka barangay sa maong munisipalidad tungod sa pagpanghasi sa rebeldeng grupo.
Gikompirmar usab ni Martinez nga may igong tropa ang 4th ID aron gukdon ang mga nagtagu-tagong sakop sa NPA sa kalasangang bahin sa Opol.
Samtang giila karon sa Chief of Staff sa Armed Forces of the Philippines ang grupong New Peoples Army isip “national organized-crime syndicates” nga nagtuyok sa daghan bahin sa Mindanao.
Gibutyag ni Martinez nga daw nawala na ang karaang ideyolihiyang gihuptan sa NPA.
Si Martinez nagtoo nga inay makigbisog ang NPA aron batokan ang mga abusado sa estado, sila naman hinoon ang gapangilkil aron matubag ang ilang kaugalingong intereses.
Gisaad sa AFP ng gukdon nila ang tanan sakop sa NPA ng mihasi sa Brgy. Nangcaon, Opol ning lalawigan.
