CAGAYAN DE ORO CITY-Midangop na sa National Bureau of Investigation o NBI-10 ang mga pamilya sa tulo ka batan-ong Misamisnon nga gitoohang gi-salvage sa Bukidnon.
Kini human nagduda ang pamilya sa mga biktima nga dili basta-basta nga grupo ang mihimo sa pag-salvage kanila ni Clifford Abales, 21; Vincent Viemen , 24; ug Don Graymar Andales, 23 anyos pipila ka oras gikan pagdampot sa kapolisan kanila sa lungsod sa Tagoloan ning lalawigan sa miaging semana.
Gibutyag sa inahan ni Graymar nga si Maria Andales nga nahinabi na sila sa NBI diin nagpasalig sa paglusad sa imbestigasyon gumikan sa hitabo.
Samtang andam ang kapolisan nga itugyan sa National Bureau of Investigation- 10 ang pag-imbestigar ug pagpasaka’g kaso sa mga responsable sa pagpatay sa tulo ka batan-on diha sa Malitbog, Bukidnon.
Gibutyag ni PNP regional spokesperson Supt Surki Serenias nga nagpahigayon na sila’g imbestigasyon aron manubag ang responsable sa krimen.
Apan kun ugaling gusto sa pamilya sa mga namatay nga ang NBI maoy mag-imbestigar ila kining ihatag.
Hisayran nga ang mga personahe sa Tagoloan Police Station ang gitudlo nga mi-salbids sa tulo ka lalaki apan kusganon kini nila nga gihimakak.
