CAGAYAN DE ORO CITY – Dili na madugay ug subli na maablihan ang temporaryo gitak-upan nga San Juan Bautista Church o ilado usab nga ‘Jimenez Church’ gumikan sa isyu nga adunay social media content creator nga nangluwa sa butangana’g bendita sa lungsod sa Jimenez,Misamis Occidental.
Kini human nagpadala na’g suwat-hangyo si Reverend Father Rolly Lagada,kura paroko sa maong parokya kang Ozamiz City Archdiocese Archbishop Martin Jumoad diin naghangyo nga buksan na’g balik ang simbahan alang sa ilang mga mga parokyano nga nahikawan makasulod epekto sa maong isyu.
Gilatid ni Lagada sa iyang sulat nga gihimo na sa mga parokyano ang mga angay buhaton aron subli mapagamit ang simbahan diin nagsilbi nila nga alampu-anan sa dugay’ng panahon sukad sa katukuran niini sa milabay’ng mga siglo.
Gihinaut sa kura paroko nga unta dunggon na sa labing talahuron nga lider sa arkidiyosisis ang hangyo sa katawhan taliwala sa mga pagsulay nga nahitabo sa simbahan.
Dumduman nga una nang misulti ni Jumoad nga hulaton nila ang sulat ni Lagada ug gilayong tukion sa board of consultors aron han-ayon ang usa ka hukom alang sa maong katuyuan.
Hisayrang nag-viral ang pagsirado sa simbahan isip tubag sa isyu nga giluwaan sa usa ka manimbahay nga babaye ang buntangana’g bendita ug gimantala sa social media niadtong adlaw’ng Domingo,Agosto 4 ning tuiga.
