CAGAYAN DE ORO CITY-Dul-a’g gatos ka pasahero ang na-stranded sa pantalan sa Macabalan dihang gikansilar ang mga biyahe sa mga barko padulong sa Visayas ug kauluhan kagahapong adlawa.
Miingon si Philippine Coast Guard o PCG regional spokesperson Ensign Jheric An John Ybanez nga epekto kini sa dakong bahad sa bagyong Ompong nga nag-landfall na sa Cagayan Valley Province.
Dugang ni Ybanez nga makabiyahe’g balik lamang ang passenger ug cargo ships kon hingpit nang makagawas ang bagyong Ompong sa bisinidad sa Pilipinas unyang gabii.
Una niini,gibutyag ni Philippine Port Authority supervisor Jonathan Saliring nga sila mismo ang naghatag pagkaon sa mga pasahero nga natanggong sa pantalan ning syudad.
Samang gatusang pasahero usab sa Philippine Airlines ug roro vessels ang na-stranded sa isla sa Camiguin.
Kini ang gibutyag ni Municipal Disaster Risk Reduction Management Officer Jejomar Bollozos sa interbyu sa Bombo Radyo.
Gikompirmar ni Bollozos nga nakalupad ang mga biyahe sa Cebu Pacific, kagahapon apan, wala makabiyahe ang mga pasahero sa PAL.
Hinoon, nakadawat sa pagkaon ang mga stranded nga mga pasehero. Una niini, gi-angkon ni MDRRMC Camiguin nga walay bisan usa ka biyahe sa roro ang ilang gitugutan sugod kagahapong adlawa.
