CAGAYAN DE ORO CITY- Gilusob sa hiniusang puwersa sa National Bureau of Investigation,kapolisan ug Bureau of Internal Revenue o BIR ang usa ka bodega nga nagsilbing himuanan sa peke nga candy nga ‘snow bear’ sa Brgy Mohon,Tagoloan,Misamis Oriental.
Gibutyag ni Mohon Punong Brgy Francis Jerson Sabio nga kanhi kompanyang Timberwood ang nagsilbing warehouse nga giabangan sa Chinese businessmen sa maong lugar.
Namahayag si Sabio nga misugat kanila ang kagamitan o raw materials sa paghimo’g snow bear candies sa pagsulod nila sa naronda nga bodega.
Dili pa mabutyag kon pila ang kantidad sa maong kontrabando kay gipaubos pa kini sa pag-imbentaryo.
Gipaubos usab sa kustodiya ang pipila ka mga trabahanteng Pinoy nga naabtan sa raiding team sugod kaganihang buntag.
