CAGAYAN DE ORO CITY – Gimanduan karon sa Philippine Military Academy o PMA ang uban nga personalidad nga boluntaryong isulti ang hawid nila na importanteng impormasyon nunot sa laing kaso sa hazing.
Kini may kalabutan sa pagkamatay sa Cagay-anon nga si PMA 4th Class Cadet Darwin Dormitorio tungod sa hazing o naghinobrang pisikal nga pagdagmal samtang anaa sa pagbansay-bansay sulod sa akademya.
Gibutyag sa Bombo Radyo ni PMA spokesperson Major Reynan Afan nga gawas sa hawid nila nga 20 ka persons of interest o POIs,gusto usab nila nga mahuptan ang laing indibidwal nga dunay direktang kasayuran sa tinood nga hitabo kang Dormitorio.
Saysay ni Afan nga dili nila palabyon ang kaso ni Dormitorio aron manubag ang utok sa hazing incident nga naghatag sa dakong epekto sa imahen sa institusyon.
Dumduman nga kasamtangang nakahaya ang patay’ng lawas sa 20 anyos nga kadete nga mismo gidalikyatan sa iyang ginikanan gikan pa sa Cagayan de Oro City nga naglikay una mahinabi sa media kay nangayo’g pribasiya sa hitabo.
