CAGAYAN DE ORO CITY-Mihimo nag diskarte ang pipila ka mga Pinoy sa Sydney Australia aron magbaton sa panagang ug malikay nga matakbuyan sa novel coronavirus.
Sa pakighinabi sa Bombo Radyo kang Jhala Grace Salas, taga Cagayan de Oro ug kasamtangang nagtungha sa University of Sydney, gibutyag niya nga nagkahinutdanay na ang facemask sa maong lugar busa mihangyo nalang siya sa iyang higala sa Pilipinas nga mopadulong sa Sydney nga dalhan siya aron adunay magamit.
Sumala pa ni Salas, nagpadayon pa gihapon ang pagsaka sa kaso sa coronavirus sa Australia, gikan sa pito, misaka na kini sa 16 ka kaso ang padayong gi-obserbahan.
Taliwala paman niini, gipaabot ni Salas sa mga Pilipino nga may paryente sa Australia nga dili na kaayo mabalaka sa ilang kahimtang gumikan kay wala magpasagad ang gobyerno sa Australia ug labihan usab ang ilang pag amping sa kaugalingon.
