CAGAYAN DE ORO CITY – Gisaway ni Villanueva Mayor Jennie Uy-Mendez ang pipila ka politiko nga utok sa paghaylo sa katawhang kabus nga mahimong botante sa iyang gidumala nga munisipyo sa Misamis Oriental.
Kini human iyang nasuta nga anaa na sa 5-mil ka bag-ong botante ang nakasulod sa Villanueva nga giingong gikan sa kalungsuran sa Opol,Initao,Manticao ug bisan sa Malaybalay City,Bukidnon.
Miingon si Mendez nga dili usab mabasol ang maong mga botante kay gipangsaaran sila nga hataga’g cash ug bugas kon maka-rehistro na.
Gihagit usab niya ang Commission on Elections nga patas ang ihatag nga aksyon sa isyu ug angay manubag ang pipila ka brgy kapitan nga nag-isyu sa sertipikasyon nga lehitimong mga residente sa lungsod ang nahisgutang mga botante.
Hisayrang may natumbok na sila nga utok sa maong pagdagsa sa mga botante rason nga mohimo sila’g pagduso’g vertified complaint sa Comelec kalabot niini.
