CAGAYAN DE ORO CITY-Gitawag ni political analyst Atty. Tony Laviña nga walay pulos ang kampaniya batok kurapsiyon ug droga sa Duterte administration.
Kini tungod sa lakang sa Department of Justice nga gi-abswelto sa kaso ang drug lords ug ang paghimo kang Janet Lim-Napoles isip witness sa PDAF scam.
Si Laviña miingon nga nabuang ang prosecutor nga nagbutyag nga walay igo nga ebidensiya batok Kerwin Espinosa, Peter Lim, Peter Co ug Lovely Impal hinungdan nga gi-dismiss ang drug trafficking case.
Gipamugos usab niini nga dili mahimo nga himoong witness si Napoles sa PDAF scam tungod kay siya ang utok sa maong kurapsiyon.
Gisugyot usab ni Laviña nga angayang buhian na si Sen Leila de Lima sa Philippine National Police Custodial Center sa Camp Crame, Quezon City.
Kini tungod sa pagka-abswelto kang drug suspect Kerwin Espinosa sa kaso nga maoy nagdoot kaniya.
Matud ni Atty Laviña nga miggawas na ang kamatooran nga gipugos si Espinosa sa pag-angkon atol sa pagdungog nga drug supplier siya ug gitudlo niya nga protector si De Lima aron mabilanggo.
Si Laviña miingon nga kumbinsido siya nga pulos imbento lang ang ebidensiya nga nagdoot sa kanhi kalihim.
Samtang nagtoo si Laviña nga posibleng balihon sa lider sa Assembly of State Parties sa International Criminal Court ang hukom ni Presidente Rodrigo Duterte nga mobiya sa Rome Statute.
Siya miingon nga dili mahimo nga mohawa ang Pilipinas sa ICC tungod kay mao lamang kini ang bugtong paagi nga mapakigbatukan ang impunity.
Nabalaka si Laviña nga mahimong makalolooy ang katawhang Pilipinhon kun ugaling mohawa ang Pilipinas sa ICC tungod kay wala nay mag-depensa sa mga kabus nga gipihig sa mga adunahan.
