Wala mahadlok ang mga prosekyutor sa Kamara sa posibleng epekto sa ilang kandidatura sa 2028 elections taliwala sa paggunit nila sa impeachment trial batok sa bise presidente.
Gitataw ni Batangas Representative Jervil Jinky Bitrics Luistro, kini chairman usab sa prosecution panel, nga ang ilang tahas pagsunod lamang sa mando sa Batakang Balaod ug walay labot sa politikanhong interes.
Namahayag usab si San Juan City Representative Ysabel Maria Zamora nga igo ra nila nga gihimo ang ilang constitutional duty.
Gidugang pa ni Zamora nga dako ang iyang kumpansa nga makita sa publiko ug sa mga senador ang kabug-aton sa mga ebidensya nga anaa sa articles of impeachment.
Kining maong lakang nagpakita sa determinasyon sa maong panel nga ipatigbabaw ang hustisya ug ang husto nga proseso sa balaod ibabaw sa bisan unsang politikanhong kabalaka.
