CAGAYAN DE ORO CITY-Gikompirmar sa komitiba sa trade and commerce sa konseho nga ubay-ubay’ng propesyonal na ang nagpaabot sa reklamo kabahin sa gisudlan nila nga investment sa Freedom Traders Club sa syudad.
Kini human masuta ni Kag George Goking,chairman sa komitiba nga bisan ang pipila ka pulis ug mga magtutudlo ang nasulod usab sa maong online currency investment.
Gihimo ni Goking ang pahayag nunot sa gipatawag niya nga committee hearing diin pakyas motunga si Mark Freeman nga founder sa club kagahapong adlawa.
Nagbahad si Goking nga kon padayong dili panumbalingon ni Freeman ang imbestigasyon sa konseho,itugyan nila kini sa Dept of Justice sa tukmang legal action.
Samtang dili rehistrado sa Security and Exchange Commission o SEC-1O ang Freedom Traders Club nga utok sa pagpakatag sa ‘plutos coins’ isip paagi sa online investment nga naglihok ning syudad.
Kini ang kumpirmasyon ni SEC regional director Atty Reynato Egypto kabahin sa online business nga gipadagan sa usa ka Mark Freeman sa syudad.
Miingon si Egypto nga unang nagpa-rehistro ang Flow Trade Management and Consultancy sa DTI-10 apan lahi ang ‘nature of business’ nga gihimo ni Freeman ning panahona.
Una nang nagpagawas ug public advisory ang SEC-Manila sa grupo ni Freeman kay nag-operate sila nga walay rehistro ug pirmiso kabahin niini.
Sa pikas bahin,bisan ang consultant for technology sa PNP-10 Cybercrime Unit ang nagtoo nga dili lehitimo nga investment ang gipakatag sa Freedom Traders Club ning syudad.
Miingon si Raven Duran, PNP-10 Cybercrime Unit consultant for technology nga dili klaro ang teknolohiya nga gigamit sa grupo ni Freeman kabahin sa maong negosyo.
Kini ang rason nga angay tubagon ni Freeman ang mga pagduda sa katawhan ilabina nga naglugwa sa public advisory ang Security and Exchange Commission o SEC nga sila wala mosunod sa gimando sa balaod.
Dugtong niini,giabli sa Bombo Radyo ang higayon aron makatubag si Freeman sa isyu sa ilang kompanya.
