CAGAYAN DE ORO CITY-Positibong giila sa mga testigo ang pipila ka pulis nga responsable sa pag-salvage patay sa magsoong Roland ug Harold Jamaca ingon kang Erika Yabut atol sa court marathon hearing sa duha ka korte ning syudad kagahapong adlawa.
Kini nunot sa padayong pagdungog sa kasong double murder batok kanila ni PO2 Manuel Quipanes ug PO1 Jun Reil Barrientos nga gitumbok nga mga suspek sa kamatayon sa magsoong Jamaca.
Gibutyag sa amahan sa mga biktima nga si retired SPO4 Rolando Jamaca nga positibo usab gitumbok sa survivor nga si Jimboy Jamaca sila si Sr/Insp Ludwig Charles Espera Insp. Arnel Gighe nga mipusil sa live-in partner niini nga si Yabut sa Brgy F.S Catanico sa syudad tuig 2014.
Una nang naka-piyansa sila si Espera ug Gigi sa ilang giatubang nga kaso samtang pabiling detinado sa city jail sila si Quipanes ug Barrientos.
Ang magsoong Jamaca ingon man ang mag-live in partners nga si Erika ug Jimboy ang pulos police assets kaniadto nga mibulgar sa pipila ka mga kabuang sa trabahong pamulis hinungdan nga sila giingong gipa-salvage sa Barangay Mambuaya ug F.S Catanico sa syudad niadtong Disyembre 11,2014.
