CAGAYAN DE ORO CITY- Ipapatay ni Pres Rodrigo Duterte kon dili man masikop nga buhi ang pipila ka pulis nga nagsilbing hired killers sa pamilyang Parojinog sa Ozamiz City.
Kini human gitanyag ni Pres Duterte ang P2 milyon nga reward sa mga tawo nga makadakop o makamatay sa maong mga pulis nga protektor sa mga ilegal nga kalihukan sa mga Parojinog.
Ang tanyag gi-anunsiyo ni Pres. Duterte atol sa iyang pakigpulong sa 116th anniversary sa Philippine National Police o PNP sa Kampo Crame didto sa kauluhan kagahapong adlawa.
Subli usab nga giaghat sa presidente ang mga pulis nga magtinarong lamang sa ilang trabaho ug motuman sa iyang direktiba kay protektado sila sa iyang administrasyon.
Samtang gikompirmar ni Pres. Rodrigo Duterte ang iyang pagbisita sa syudad sa Ozamiz karong bulana.
Apan nagdumili ang presidente sa pagbutyag sa petsa sa iyang pagduaw sa Ozamiz alang sa iyang seguridad.
Gihimo sa presidente ang pahayag dungan sa pagbutyag nga daghang mga pulis nga misulay sa pagsanta sa illegal drug operations sa Ozamiz City ang gipa-patay sa pamilyang Parojinog.
Dugang ni Pres. Duterte nga may unom usab ka sundalo nga gipa-patay sa nasampit nga pamilya.
Samtang ipaatubang sa PNP-10 sa imbestigasyon ang pipila ka pulis nga gitumbok ni Pres Duterte nga giingong hired killers sa pamilyang Parojinog sa Ozamiz City.
Kini human unang gimando ni Pres Duterte nga ipadakop ang maong mga pulis nga nahimong mga kriminal ubos sa mando sa mga Parojinog.
Gibutyag ni PNP regional spokesperson Supt Lemuel Gonda nga gilayong mohimo’g pakisusi niini ang intelligence unit aron ilhon ang maong mga pulis nga gipasabot ni Duterte.
