CAGAYAN DE ORO CITY-Pagkatangtang sa trabaho ug pag-atubang sa kasong kriminal ang dangatan sa pipila ka pulis nga nalambigit sa ilegal nga kalihukan ilabnina sa pagbaligya’g gidiling droga dinhi sa rehiyon.
Pasidaan kini ni PNP Deputy Director General for Administration C/Supt Ramon Apolinario dihang nasayran nga pipila sa mga pulis ang nalambigit sa narco-police activities inay mopatuman sa balaod.
Butyag pa ni Apolinario nga dili magdugay ang pipila ka pulis sa ilang mga kalihukang ilegal tungod sa istrikto nga palisya ni Pres Rodrigo Duterte.
Samtang dili gusto’g disturbo sa trabaho si Apolinario ilabina sa anti-criminality campaign sa Duterte administration.
Kini human nagdumili si Apolinario pagtubag kon andan na ba siya mohulip sa ibakante nga puwesto ni PNP Chief Dir Gen Ronald de la Rosa ilabina sa oras nga mo-retiro na sa tuig 2018.
Naghangyo si Apolinario sa media nga likayan una ang pagpangutana sa maong isyu kay wala kaniya ang kontrol kon kinsa ang sunod nga mahimong sunod nga hepe sa PNP sa tibuok nasud.
