CAGAYAN DE ORO CITY-Nagpadayon ang hot pursuit operation sa kapulisan sa mga rebeldeng New Peoples Army (NPA) nga miambush sa 25 ka mga pulis nga miresponde sa murder incident sa KM 23, Tikalaan sa Talakag, Bukidnon.
Matud ni SInsp. Jessie James Lasdose, hepe sa Talakag PNP nga ilang na-engkwentro ang mga armadong grupo sulod sa 15 ka minutos.
Gipaulanan sila’g bala sa mga armado samtang nagpahigayon sa checkpoint ang mga pulis nga sakop sa Police Regional Mobile Force Battalion-Northern Mindanao (RMFB-10).
Hisayran nga maoy gi-respondehan sa mga pulis ang kasong pagdunggab-patay kang Wenceslao Caumban nga taga Kalilangan, Bukidnon.
Gipahimangnuan ni Lasdose ang katawhan nga mobiyahe ubos sa iyang area of responsibility nga dili basta-basta mohunong kun ugaling adunay dili kaila nga tawo nga mopara kanila aron mangilkil.
Una nang gibutyag ni Misamis Oriental Provincial Police Director Ronaldo Destura nga aduna silay nadawat nga report nga mga bahad sa pagpangatake nga pagahimuon sa NPA.
