CAGAYAN DE ORO CITY – Namugos ang liderato sa Police Regional Office 10 nga wala magkulang sa paghatag seguridad ang mga pulis batok kriminalidad sa milabay’ng holiday season dinhi sa rehiyon.
Kini bisan kon nalutsan sa grupo sa mga tulisan ug nalungkab ang Gaisano-Ozamiz Branch diin nalimas ang minilyong salapi ug mga alahas sa duha ka pawnshops ingon man bank ATM sa miaging Disyembre 2023.
Miingon si PRO 10 spokesperson Maj Joann Navarro nga nakahimo’g security breifing ang Misamis Occidental PNP kuyog ang mga negosyante sa probinsya ug mga syudad apan pabiling nalutsan ang ilang seguridad sa mga kawatan.
Sa pikas bahin,pasidunggan bisan nakadawat sa mga pagsaway ni Misamis Occidental Gov. Henry Oaminal ang mga pulis sa Ozamiz City Police Station ubos sa pagpangulo sa ilang kumander nga si Maj. Dennis Tano.
Kini human alang kang Oaminal,paspas naka-responde sa labing dakong lungkab sa syudad sa Ozamiz nga nag-resulta sa pagka-aresto sa lima ka gitoohang mga responsable.
Siya miingon nga nagpakita lamang kini nga wala matugot ang kapolisan nga maghari ang mga kriminal rason nga nakasuhan sa robbery complaint sila Alfred Gomez Baterna;Francis Joe Sayson Baterna;Alberto Quimlo Batolaso nga pulos taga-Tangub City;Brian Komplito Montealto ug Ramil Apatan Villarmente nga gikan usab sa Zamboanga del Sur.
