Dili tiaw ang kabalaka nga nabati sa pipila ka residente sa Barangay Lumbia sunod sa pag-abot sa mga sundalong Amerikano nga magpahigayon og military training sa Lumbia Air Base.
Gibutyag ni Kagawad Aerol Torralba nga mixed emotions ang reaksyon sa katawhan sa Cagayan de Oro tungod kay adunay uban nga nakasabot sa tumong sa training apan adunay gihapoy kahadlok ug kabalaka ang pipila ka residente.
Matod sa opisyal nga duol lamang sa komunidad ang air base nga nalakip sa Enhanced Defense Cooperation Agreement maong sayon nga mabati sa mga lumulopyo ang tensyon sa kasamtangang kahimtang.
Dugang niya nga adunay mga residente nga padayong mangutana sa barangay kon unsa gyud ang tumong sa presensya sa mga sundalong Amerikano sa lugar.
Busa naghangyo si Torralba sa klarong impormasyon gikan sa mga otoridad aron mapakalma ang kabalaka sa mga residente. (co-written by James Oliver)
