CAGAYAN DE ORO CITY-Gikasuhan na si Criminal Investigation and Detection Group o CIDG sila si incumbent Kinawe Brgy Kapitan Cherry Barros; at large nga si kanhi barangay chairman Tarsicio Barros ug laing 16 ka mga private army niini.
Matud ni CIDG chief investigator SPO4 Noel Oclarit nga ila na usab gi-turn over sa DSWD-Libona ang anak ni Barros nga giingong adunay deperensiya sa pangutok.
Una niini, nakig-pinusilay sa kapolisan ang grupo Barros samtang gisilbi ang 6 ka search warrant sulod sa compound niini sa Kinawe, Libona, Bukidnon nga gikaangol sa tulo ka sundalo.
Hisayran nga ubay-ubay ka mga armas, granada ug gamit pamomba ang nakompiskar sa panimalay sa suspek.
Samtang gibutyag karon ni Oclarit nga ilang gi-locate ang nahimutangan sa wanted person nga si Misamis Occidental Board Member Reynaldo “Ardot” Parojinog sa Bukidnon.
Si Oclarit miingon nga wala nila makita ang presensiya ni Parojinog sulod sa panimalay sa pamilyang Barros sa ilang operasyon.
Apan dako ang iyang pagtoo nga nagtago sa maong lugar ang wanted person ilabina nga ang 16 ka private army nga ilang nadakpan pulos residente sa Misamis Occidental.
