CAGAYAN DE ORO CITY- Hingpit nang nag-atubang sa kasong illegal possession of explosives ang tulo sa upat ka suspek nga sakop sa teroristang Maute-ISIS nga unang nasikop sa Martial Law -Special Action Group o ML-SAG sa Sitio Aluba, Brgy Macasandig ning syudad.
Kini human nakit-an sa prosecution nga may gimbug-aton ang kaso nga gipasaka sa CIDG-10 batok sa nagsilbing intelligence liason officers sa mga terorista nga nagtinguha nga bombahan ang syudad.
Gibutyag ni CIDG deputy regional director for operations Supt Melgar Devaras nga naghulat na lamang sila sa kamanduan sa korte aron itugyan sa bilangguan sa kauluhan ang mga suspek.
Kabahin sa mga gikasuhan sila si Tahera Romato Taher; Gazim Mantawazi Abdullah ug Monaliza Solaiman Romato diin nakuhaa’g kagamitan paghimo’g bomba sulod sa giabangan nila nga pinuy-anan sa miaging semana.
