CAGAYAN DE ORO CITY-Luwas nga nakalikay sa peligro ang mga sundalo nga sakop sa 88th IB, Philippine Army sa duha ka granada nga mibusikad sa Brgy Salawagan, Quezon, Bukidnon.
Kini human labaya sa Guerilla Front Committee 6 sa rebeldeng New People’s Army o NPA ang barracks sa mga sundalo nga naghatag seguridad sa gitrabaho nga farm to market road sa maong lungsod.
Miingon si 4th ID spokesperson 1Lt Tere Ingente nga hinoon walay nasamdam sa mga sundalo kinsa target nga gipabuthan sa mga granada.
Gibatikos usab ni Ingente ang tinalawan nga gihimo sa mga rebelde diin nagbutang sa peligro sa katawhan nga nanimuyo sa maong lugar.
Samtang makabalik na’g trabaho sa dili madugay ang lima ka sundalo nga kabahin sa naangol dihang gi-ambush sa rebeldeng NPA sa Brgy New Eden, Pangantucan, Bukidnon.
Kini human padayong gihatagan sa medikasyon ang maong mga sundalo gikan sa 1st Special Forces Batallion nga nadala sa Camp Evangelista Station Hospital ning syudad.
Miingon si Ingente nga nagpakita lamang sa pagkawalay kasingkasing sa mga rebeldeng NPA bisan naghatag sa batakang serbisyo ang mga sundalo sa katawhan sa lugar.
Unang gi-ambush ang mga sundalo apan paspas nakabalos hinungdan milungtad sa 10 minutos ang sinukliay sa mga bala.
