CAGAYAN DE ORO CITY-Gikasuhan na sa kapolisan ang upat ka suspek nga mipusil-patay sa municipal doktor sa Kapatagan Annex,Lanao del Norte sa miaging Marso 1 ning tuiga.
Gibutyag ni Lanao del Norte provincial director Sr Supt Faro Antonio Olaguera nga maoy ilang gikasuhan sa piskalya ang tulo ka lalaki ug usa ka babaye nga gitumbok sa mga testigo nga mipatay kang Dr Dreyfuss Perlas nga taga-Batan,Aklan.
Si Olaguera miingon nga dili una nila iyagyag ang tanang detalye batok mga suspek samtang wala pa molugwa ang warrant of arrest gikan sa korte.
Naigo sa likod ang biktima ug milahos sa kasingkasing hinungdan sa hinanali nga kamatayon niini niadtong gabii sa Marso 1 ning tuiga.
Si Perlas ang pinangga sa katawhan sa Lanao del Norte tungod sa dedikasyon sa trabaho niini diin nagsilbing municipal health officer sa lungsod sa Sapad.
