CAGAYAN DE ORO CITY-Nakuhaan na’g mga testimonya sa PNP-Internal Affairs Service Region 10 ang pipila sa mga miembro sa mga pamilyang Parojinog ug mga piniriso sa Ozamiz City.
Kini nunot sa anti-illegal drug operations diin gikamatay ni City Mayor Reynaldo Parojinog Sr ug laing 15 pa sa maong syudad sa miaging semana.
Gibutyag ni PNP-IAS regional director Sr/Supt Gerry Galvan nga dismayado sila kay wala sila tungahi sa duha ka giingong testigo kon giunsa paglusad sa kapolisan ang operasyon batok mga Parojinog.
Nakuhaan lamang nila sa pahayag ang menor de edad nga anak-babaye ni detained City Vice Mayor Nova Princess Parojinog ug laing duha ka sibilyan nga gitago ang mga pangalan.
Moduso’g rekomendasyon si Galvan sa resulta sa imbestigasyon sa PNP-IAS Manila sa dili pa mahuman ang Agosto ning tuiga.
Hisayrang tinguha unta sa IAS nga makuha’g testimonya ang gitumbok nga mga testigo nga sila si alyas Cesar ug alyas Junjun nga nag-akusar nga gipang-patay sa mga pulis ug wala manukol ang 16 ka tawo apan wala kini mopakita.
