Mga trabahante sa industriya sa bisti sa Bangladesh, nagprotesta alang sa usbaw sa sohulan

Migamit ang kapulisan og tear gas ug sound grenades aron pahawaon ang mga nagprotestang trabahante sa industriya sa bisti sa Bangladesh, samtang misulod sa ikaupat nga sunod-sunod nga adlaw ang ilang demonstrasyon karong adlawng Martes, Nobyembre 3.

Gipangayo sa mga trabahante ang pagtaas sa minimum nga suholan kada bulan gikan sa 12,500 taka ngadto sa 30,000 taka, o katugbang sa 245 dolyar, tungod sa padayong pagsaka sa presyo sa mga batakang panginahanglanon ug sa implasyon.

Nagresulta ang mga panagbangi sa pag-ali sa mga dagkong dalan, pagsuspenso sa operasyon sa mga pabrika ug pagkaangol sa daghang tawo, lakip ang pipila ka opisyal sa kapulisan, bisan pa sa pagporma sa gobyerno og unom ka miyembrong wage board niadtong Nobyembre 1 aron repasuhon ang suholan sa sektor.

Nagpasidaan ang mga lider sa industriya nga ang dugay nga pagsira sa mga pabrika mahimong makapalangan sa mga kargamento sa eksport ug makadaot sa reputasyon sa Bangladesh isip kasaligan nga tinubdan sa mga produkto sa bisti alang sa internasyonal nga merkado. (raniel mahunyag)