Gipahibalo sa Civil Aviation Authority of the Philippines (CAAP) ang mga pagpangandam sa mga tugpahanang sakop sa ilang pagdumala alang sa pag-abot sa mga lider sa nasud ug mga delegado nga motambong sa umaabot nga 49th ASEAN Summit.
Tungod sa maong panagtigom sa rehiyon, kapin 300 ka domestic flights ang kanselahon o usbon ang iskedyul sugod Nobyembre 14, hinungdan nga nagbutang ang Department of Transportation (DOTr) og mga help desk sa Ninoy Aquino International Airport (NAIA), Clark International Airport ug Mactan-Cebu International Airport aron motabang sa mga pasahero.
Giawhag usab sa mga otoridad ang mga biyahero nga susihon daan ang kahimtang sa ilang mga flight ug mokontak sa ilang mga airline aron malikayan ang kalisud sa pagbiyahe.
Sa bahin sa seguridad, gipahibalo sa Metropolitan Manila Development Authority (MMDA) nga walay kinatibuk-ang pagsira sa mga kadalanan alang sa maong summit, apan adunay mga gitakdang security exclusion zone palibot sa Philippine International Convention Center (PICC), diin gihugtan ang pagsulod sa mga sakyanan ug indibidwal nga walay otorisasyon. (raniel mahunyag)
