Dakong hagit karon sa mga otoridad ang pagtultol ug pagdakop sa mga utok luyo sa nabisto nga large-scale illegal mining operation sa Barangay Tuburan, Cagayan de Oro City.
Giyagyag sa Police Regional Office 10 spokesperson nga si Police Major Joann Navarro nga nag-operar ang maong ilegal nga minahan luyo sa permiso nga sand and gravel operation aron matago ang kalihokan.
Hisayrang, nagsugod na sa pagpahigayon ug paper trail ang kapolisan kauban ang Mines and Geosciences Bureau Region 10 aron matukid kon kinsa ang tunhay nga naglukat sa permiso, kinsa ang tag-iya sa mga gipang-deposito nga heavy equipment, ug ang gitumbok nga foreign national nga maoy gituohang nag-finance sa maong operasyon.
Pinasikad niini, gipasalig sa kapulisan sa publiko nga dili mohunong ang buhatan hangtod nga mahubad ang maskara sa mga financiers ug matubag ang tanang pangutana sa legalidad ug sa mga nagpaluyo sa maong ilegal nga pagmina.
