CAGAYAN DE ORO CITY – Giunay ra’g bomba sa kanhi estudyante nga si Khadafi Mimbesa alyas Engr ang Mindanao State Univesity- Marawi Main Campus diin siya nagtungha sa tuig 1993.
Kini ang dugang kalambuan sa imbestigasyon sa SITG Dimaporo Gymnasium Explosion kabahin sa improvised explosive device explosion nga unang gikamatay sa tag-duha ka magtutudlo ug mga tinun-an samtang misimba niadtong Domingo sa buntag.
Miingon si Police Regional Office Bangsamoro Autonomous Region Director Brig Gen Allan Nobleza nga hayan napasayon ang access ni Mimbesa kay kanhi kini estudyante sa MSU nga mikuha sa kursong BS in agricultural engineering sa tuig 1993 hangtod 1998.
Mibalik kini pagtungha sa 2007 apan pakyas gihapon mahuman sa maong kurso.Una nang gitudlo sa kapolisan ug militar nga sakop si alyas Engr ug Arsani Mimbesa alyas Lapitos sa grupong Dawlah Islamiyah-Maute Group nga maoy nakit-an sa sulod sa gymnasium nga nagdala sa bomba.
Dumduman nga tipik sa mga namatay sila MSU faculty members Riza Ramos Daniel, Evangeline Aromin ingon man ang mga tinun-an nga si Janine Arenas ug Junrey Barbante nga taga- Tangub City,Misamis Occidental.
Dugtong niini,mitayang sa dakong balor sa reward money ang gobierno alang sa dali nga kasulbaran sa pagpamomba sa main campus sa MSU-Marawi.
Kini ang gitug-an ni Nobleza alayon sa walay hunon nga joint operations sa kapolisan ug militar batok sa Dawlah Islamiyah- Maute nga unang gitudlo nga responsable sa hitabo.
Miingon si Nobleza nga gawas sa sobra tunga sa milyon ka pesos nga gitanyag alang sa ulo ni Khadafi Mimbesa alyas Engr,laing dakong kantidad sa salapi ang naghulat alang sa mga tawo nga makatabang sa pagtumbok sa lokasyon sa ilang grupo.
Si Kadhafi ug alyas Lapitos ang nakuhaan sa CCTV camera nga paspas mibiya sa gymnasium human mibusikad ang bomba.
Samtang gipasalig sa kadagkuan sa university officials nga magpabiling ‘isolated’ ang dili maayong gidangatan sa ilang mga estudyante ug mga magtutudlo nunot sa pagbusikad sa bomba.
Miingon si MSU spokesperson Atty. Shidik Abantas nga anaa ang ilang 100 percent nga kooperasyon sa mga otoridad alang sa mas hugot pa nga seguridad sa ilang komunidad.
Siya miingon nga kamulo nila nga gihan-ay ang petisyon ug gabayan aron kanunay nang anaa ang presensiya sa mga sundalo’g pulis ubos sa bisinidad sa ilang unibersidad.
Hisayrang sobra libo ka estudyante nga naggikan sa nagkadaiyang rehiyon sa Mindanao ang napugos pag-uli mismo adlaw sa pagbusikad sa bomba tungod sa gibati nila nga kalisang ug trauma.
