CAGAYAN DE ORO CITY-Ipatawag ni Pres Rodrigo Duterte ang sila si MNLF founder Nur Misuari ug MILF chairman Al Hadj Murad Ebrahim igo paghuman sa kasaulugan sa Eid’l Fitr o pagtapos sa pag-obserbar sa Ramadan sunod semana.
Kini human nasayran ni Pres Duterte sa Bombo Radyo ang impormasyon diin nagtumbok nga giingong nagsuplay sa mga armas ang MILF ug MNLF sa teroristang Maute aron magamit pakigsangka sa militar sa Marawi City,Lanao del Sur.
Gihimo kini nga tubag ni Duterte dihang mismo ang Bombo Radyo nangutana kaniya atol sa pagduaw niini sa 79 ka sundalo nga samaron gikan Marawi City nga naka-confine sa Camp Evangelista Station Hospital sa Brgy Patag sa syudad kagabii.
Kini na ang ika-upat nga pagduaw ni Duterte sa syudad aron duawon ang mga samaron nga kasundaluhan nga nakig-engkuwentro batok sa mga terorista sa Marawi City.
