CAGAYAN DE ORO CITY – Dili na ulahi apan angay nang mag-una sa kaugmaran ilabina sa aspeto sa ekonomiya ang Mindanao.
Kini ang hagit ni Mindanao Devt Authority o MinDa Sec Emmanuel Piñol sa local govt units ug mga negosyante sa 1st Philippine Industrial Summit nga gihimo sa dakbayan ning semanaha.
Miingon si Piñol nga taas nang panahon nga kanunay lamang naulahi ang rehiyon,busa,gidasig ni Piñol ang mga negosyante nga tabangan ang local govt units pinaagi sa pagbubo sa mga negosyo nga ikapapas paglambo sa panginabuhi sa katawhan dinhi sa Mindanao.
Samtang igong proteksyon ug kontra sa kurapsyon ang gigarantiya ni Gob Bambi Emano ngadto sa mga negosyante nga naglaraw pagbubo sa ilang pamuhunan sa Misamis Oriental.
Kini maoy paagi sa pagdani sa gobernador samtang gidalitan sa probinsiya sa engrandeng panihapon ang mga negosyante nga miapil sa unang industrial summit sa nasud diha sa Xavier Estates,Upper Balulang sa syudad kagabii.
Miingon si Emano nga makalaum ang mga negosyante nga dili sila mahilabtan samtang kini mopadako sa ilang mga negosyo kay malinawon nga lugar ang Misamis Oriental sukwahi sa gipatoo sa mga tawo nga wala gani makapuyo sa Mindanao.
Dugtong niini,uyon si Regional Peace and Order Council chairman City Mayor Oscar Moreno nga wad-on na ang martial law nga gipatuman sa Mindanao.
Kini human unang gibati ni Pres Rodrigo Duterte ang iyang pag-uyon sa suhestiyon sa pipila ka sektor nga dili na lugwaya ang martial law nga matapos sa Disyembre 31 ning tuiga.
Miingon si Moreno nga bisan wad-on ang martial law apan aktibo usab ang ‘whole of the nation approach’ sa gobierno nga nalatid sa executive order no. 70 ni Duterte.
Dugang sa opisyal nga dili usab mohuyang ang ipatuman nga seguridad aron pagsanta sa kalihukan sa insurhensiya ug terorismo nga dakong problema dinhi sa rehiyon.
