CAGAYAN DE ORO CITY -Tukion sa pagbalik-sesyon sa kamarabaha ang tinud-anay nga kahimtang sa survivors sa Marawi Seige nga pabiling wala pa hingpit matagi’g ensaktong pagtagad sa ilang mga kahimtang sa Marawi City.
Kini human duawa sa Mindanao congressmen ug pipila ka taga-Luzon lawmakers ang aktuwal nga kahimtang sa mga biktima nga unang nag-lihok protesta tungod sa hinay nga pagpamayad sa gobierno ngadto sa ilang kahimtang.
Miingon si Mindanao Affairs Commitee chairman Misamis Oriental 2nd District Cong.Bambi Emano nga dako’g tabang ang ilang aktuwal nga pagtunob sa Marawi City kagahapon.
Kini aron makaporma sila’g dugang mga lakang alang sa internally displaced persons o IDPs nga nahasol pag-ayo sa kagubot tuig 2017.
Hisayrang nga tungod sa lima ka bulan nga engkuwentro tali sa tropa sa gobierno ug mga teroristang Maute-ISIS,daghan ang namatay, napugos pagbakwit ang mga residente tungod sa pagbinombahay sa duha ka panig.
