CAGAYAN DE ORO CITY – Dili tawo apan daw ginoo sa boksing ang pag-ila ni IBF/WBO/WBA ug The Ring Magazine boxing champion Teofimo Lopez ngadto kang eight world division champion Manny Pacquiao.
Kini ang reaksyon ni Lopez sa silyado na nga pagbalik-away ni Pacman ug makontra niini ang walay pildi sa welterweight division nga si US boxing champion Errol Spence Jr sa Las Legas,Nevada, USA sa Agosto 22 ning tuiga.
Miingon si Lopez nga kon kanus-a nagsaka ang edad nga sagad ting-retiro na sa mga dekalibreng boksidor,apan sukwahi kini kang Pacquiao kay mangita pa’g away rason nga napili niini si Spence.
Kini ang hinungdan nga dili daw sipyaton ni Lopez nga personal nga saksihan ang Pacquiao-Spence fight sa Las Vegas ning tuiga.
Samtang bisan si kanhi four time boxing champion Mikey Garcia ang kumbinsido sa kalig-on ni Pacman.
Nakita kini niya mismo sa pagdawat ni Pacquiao sa mga kinomo kaniadto gikan kang kanhi US boxing champion Keith Thurman.
Wala matumba si Pacman apan si Thurman ang nakatilaw sa knockdown sa maong away.
Kini ang rason nga nagtoo si Garcia nga kon dili ma-knockout ni Spence si Pacman,kini ang mabutang sa peligro sa ilang away.
Kumbinsido si Garcia nga duna gihapo’y bintaha si Spence apan kon dili kini magamit niya’g ensakto,ilhon gihapon nga kampeon si Manny.
