CAGAYAN DE ORO CITY – May kakulangon ang lima ka gwardiya hinungdan nalusob sa 30 ka NPA rebels sa quarry site sa Minergy Power Plant diha sa Balingasag, Misamis Oriental.
Miingon si Police Provincial Director Police Col. Robert Roy Bahian nga gibiyaan sa mga gwardiya ang pagbantay sa quarry site dihang dungan sila nga nagkaon sa pamahaw sa maong adlaw.
Apan gitin-aw sa opisyal nga magpadayon pa ang ilang imbestigasyon aron mahibal-an ang rason kung nganong wala makasukol ang mga gwardiya dihang gidis-armahan sa mga rebelde ilabina nga nagbaton sila sa mga tag-as nga kalibre sa armas.
Sa pagkakaron,gisalig ni Bahian sa Civil Security Group ang pag-imbestigar ilabina nga mao kini ang gitahasan ni PNP chief General Oscar Albayalde.Samtang posibleng mawad-an sa lisensya ang AY76 security agency nga nakabase sa probinsiya sa Misamis Oriental.
Kini human madis-armahan sa mga rebeldeng New Peoples Army ang lima niini ka mga gwardiya nga maoy nagbantay sa quarry site sa Minergy Power Plant sa Balingasag sa maong lalawigan.
Si Police Regional Office o PRO-10 spokesperson Police Lt.Col.Mardi Hortillosa miingon nga mihimo na sila’g kaugalingong imbestigasyon human gimando ni Albayalde nga imbestigaran ang hitabo.
Asoy ni Hortillosa nga gusto mahibal-an sa PNP chief kon may kakulangon ang maong ahensiya nga nabawian sila sa mga rebelde sa lima ka AK47 assault rifles, radio transceiver sets ug uban pang mga kagamitan.
