CAGAYAN DE ORO CITY – Nakabawi’g laing minilyong balor sa gitoohang kontrabando ang kapolisan sa ilang gihimong pagpatrolya sa Brgy Piraka,Sultan Naga Dimaporo,Lanao del Norte.
Gibutyag ni Police Regional Office 10 Director Brig Gen Jaysen De Guzman nga maoy nakompiskar sa ilang lower units ang anaa sa 170 ka boxes sa klase-klaseng sigarilyo nga adunay kantidad sa halos 7 milyones pesos.
Sa impormasyon gipaabot sa hiniusang operasyon sa Sultan Naga Dimaporo Municipal Police Station, 2nd Lanao del Norte Provincial Mobile Force Company,1005th Company sa Regional Mobile Force Battalion 10 ug Maritime Police Station – Lanao del Norte nga narekober nila ang maong kontrabando nunot sa gitaho sa mga residente nga nakabantay sa maong kontrabando daplin sa lapyahan.
Migula usab ang pagsaysay nga usa ka alyas Acmad ang tag-iya sa maong kargamento nga gibilin sa lugar.
Gitugyan na sa kapolisan sa Bureau of Customs ang maong mga kontrabando alang sa imbentaryo niini.
