Gikumpirma ni Nick Jabagat, CDRRMD Manager, nga minor nga danyos lamang ang natala sa pipila ka mga istruktura human sa intensity 3 nga linog nga nabati sa dakbayan sa miaging adlaw.
Gitin-aw niya nga ang nakita nga mga hairline cracks anaa lamang sa mga paril ug walay nakitang seryosong kadaot sa mga poste o kolum sa mga building.
Samtang nagpadayon ang hugot nga monitoring, gipahibalo ni Jabagat nga gi-inspeksyon na usab ang mga tulay, eskwelahan, ug mga hospital sa mga sakop sa City Engineering Office.
Gipasabot usab sa maong opisyal nga luwas pa gihapon nga gamiton o i-occupy ang mga edipisyo, apan gikinahanglan lamang kini og tukmang pag-ayo aron mawala ang kabalaka sa publiko.
Sa katapusan nanawagan usab ang opisyal ngadto sa mga private establishment nga magsumiter og report kabahin sa status sa ilang tagsa-tagsa ka mga estruktura isip kabahin sa protocol.
