CAGAYAN DE ORO CITY – Dili palabyon sa kapolisan ang pagkaso’g kriminal sa driver sa pick-up vehicle nga unang mibangga sa tulo ka bata nga igo lang nagbaklay daplin sa highway sa lungsod sa Naawan,Misamis Oriental.
Kini human nangrason ang driver nga si Edward Jimenez Jr nga taga-Lugait ning lalawigan nga nakatulog siya hinungdang wala na niya mabantayi nga nakaligis na sa mga biktima.
Miingon si Naawan Police Station commander Police Maj. Reynante Labio nga dili kini kumbinsido sa palusot sa driver kay subay sa CCTV footage,mihimo kini’g pag-overtake sa dakong sakyanan rason nga napunggit ang mga biktima.
Namatay sa maong hitabo si Erica Mae Basinay samtang anaa pa sa Northern Mindanao Medical Center si Neil Naluan ug nakagawas na ang 7 anyos nga kauban sa mga biktima kagahapong adlawa.
