CAGAYAN DE ORO CITY – Kuha-an unta’g pipila ka duties and responsibilities ang bise-mayor sa napanday nga house rules and procedures sa mayoriya sa konseho sa dakbayan.
Kini ang pagbulgar sa minoriya sa konseho sa dihang nagkatagbo sa labing unang sesyon sa konseho ang mga konsehal ug bise-mayor sa dakbayan.
Gibutyag ni Kag James Judith,lider sa minoriya sa konseho nga mao unta’y wad-on sa mayoriya nga gahom ni City Vice Mayor Jocelyn ‘Bebot’ Rodriguez nga makahatag kini’g instruction ug may kontrol sa agenda nga angayang tukion o dili sa mga sunod nga sesyon sa konseho.
Akusasyon sa minoriya nga gusto sa mga alyado sa Uy administration nga gikan sa majority leader ang mando nga buhaton sa council secretary ayha makalihok si Rodriguez.
Samtang naag-doble na ang maong probisyon nga nalatid sa proposal ug existing house rules & procedures rason nga giwagtang sa mayoriya ang pipila ka gahom nga iya sa bise-mayor sulod sa konseho.
Kini ang depensa ni City Council Asst Majority Floord Leader Kag Romeo Calizo kabahin sa pag-kuwestiyon sa oposisyon sa konseho.
Apan gipasabot ni Judith nga imposible ang gustong mahitabo sa mayoriya kay tataw kini nga dakong supak sa balaod.
Dugtong niini,gilayong gitanyagan ni Majority Floor Leader Kag Ian Mark Nacaya nga tukion ubos sa adhoc committee ang maong isyu kon isibog ni Judith nga hisgutan sa plenaryo ang maong isyu.
Samtang gitambagan ni kanhi City Vice Mayor Antonio Soriano ang 20th council members nga makamao mo-respeto ug magtoon sa mga patakaran sulod sa konseho.
Kini ang reaksyon ni Soriano kabahin sa nabulgar nga paghikaw unta sa mayoriya sa pipila ka functions sa bise-mayor nga presiding officer sa matag-sesyon sa konseho sa dakbayan.
Gibutyag sa kanhi-bise mayor nga dakong ilegal ang maong proposed house rules and procedures nga gustong ipalusot sa bando sa mayoriya sa adminitrasyon.
