CAGAYAN DE ORO CITY – Gihaw-as sa buhatan ni Misamis Oriental 2nd District Cong. Bambi Emano gikan sa kasinatiang postpartum depression ang Misamisnong inahan nga unang nanimpalad sa Athens,Greece didto sa Orupa.
Kini human nagtabang si Irish Jean Talaboc nga gikan sa Punong,Claveria,Misamis Oriental sa iyang pamilya diin midangop usab sa ilang brgy officials ug misangko sa buhatan sa kongresista aron siya makauli pabalik sa Pilipinas.
Dili kini una apan daghang higayon na nga milampos ang congressional district office ni Emano kuyog sa ubang nasudnong mga ahensiya sa gobierno pagluwas sa pipila ka overseas Filipino workers nga adunay mga kasilik-an sa ilang kahimtang sa panarbaho sa abroad.
Kini ang rason nga walay laing nadumduman ang pamilya Talaboc nga modulo sa Balay Nenotchka aron mangayo’g tabang diin sila wala pakyasa sa ilang gihangyo lang kang Irish Jean.
Mismo ang congressional district office staff ni Emano ang misugat kang Talaboc sa pagtugpa sa eroplano sa Laguindingan International Airport aron ihatod pa kini sa ilang pinuy-anan sa Claveria.
Gani,wala magdahom si Irish Jean nga tubu-on kini sa mga sakop sa kongresista sa airport rason nga emosyonal kining nagpasalamat sa Ginoo nga adunay mga tawo nga mitubag sa iyang gihangyo nga panabang.
Dumduman nga ang postpartum klase sa depresyon nga sagad moigo sa kababaye-an kung magbaton na’g himugsong anak diin sila nagkupot sa dili masabot nga emosyon.
