CAGAYAN DE ORO CITY – Mag-atubang sa kasong concubinage ang giingong anchorman sa FM station ug ang babaye nga gitudlong kalambigit niini sulod sa daghang katuigan dinhi sa syudad.
Giila sa kapolisan ang mga dinakpan nga si Norjim Eligan,giingong anchor sa Balingasag-based FM station ug si Jessa Ladao nga taga- Gingoog City,Misamis Oriental.
Subay sa report,giingong nasapon sa lehitimong kapikas kuyog ang kapolisan ang duruha samtang anaa sulod sa boarding house sa Brgy Bugo ning dakbayan.
Miingon ang kapikas nga si Terry Eligan nga mihupas na ang iyang pailob rason nga kini nakahukom nga ipadakop sa mga sakop sa Puerto Police Station ang iyang bana aron kasuhan sa piskalya ning syudad sunod semana.
Namahayag ang ginang nga posibleng dugay na kining gibudhian sa suspek.
Kini ang rason nga bug-os ang hukom sa lehitimong misis nga putlon ang binugkos nila nga relasyon sa suspek aron mahatagan sa hustisya ang giingong pagbudhi sa ilang kaminyoon.
Una daw niini,gipadal-ag mensahe ni Ladao si misis diin nagsaysay nga dako kining makalolooy kay siya ang pinakaslan ug de papeles apan ngadto kaniya mikuyog ang iyang bana.
Apan giingong mitubag usab ang orihinal nga dili siya ang looy kay magamit niya ang mga dokumento sa kasal aron ipa-priso ang mga mibudhi kaniya.
Dugtong usab niini,nangayo daw sa pasaylo si Eligan apan wala na pabori sa iyang kapikas.
Si Eligan ang giingong nagtrabaho usab sa dakong politiko nga nakabase sa unang distrito sa Misamis Oriental.
Pabiling bukas usab ang sibyahan sa Bombo Radyo alang sa panig ni Eligan ug Lanao kabahin sa isyu.
