CAGAYAN DE ORO CITY – Namiligro nga dili kalingkod ang usa ka nasublian sa pagka-board member sa Misamis Oriental sa pagka-30 sa Hunyo sa udto ning tuiga.
Kini human kompirmaha ni Misamis Oriental Provincial Election Supervisor Atty Carlito Ravelo nga naa sa lima ka kandidato sa nagkadaiyang political position ang wala moduso sa gimando sa balaod nga Statement of Contributions and Expenditure o SOCE daug man o pildi sa milabay’ng May 12 elections.
Miingon si Ravelo nga kabahin sa lima ang usa ka aktibong sakop sa Sangguniang Panlalawigan sa probinsya nga pakyas makasang-at sa gipangayo nga SOCE.
Siya miingon nga bugtong himoon sa maong wala niya panganli nga board member nga mosang-at sa iyang SOCE sa Comelec-Manila ug manubag usab kini sa DILG kung angay makalingkod.
Gibutyag niini nga nangulipas daw ang maong opisyal nga nalimot kini sa pag-SOCE file kay daghan ang mga sugo sa mga bosing niini.
Tungod niini,duha-duhaan pa kung makalingkod ang nahisgutang opisyal nga wala makasang-at sa SOCE diin kutob ra sa petsa 11 sa Hunyo.
Samtang ang upat ka wala makaduso ang naggikan sa pipila ka lungsod sa lalawigan ug dinhi usab sa dakbayan.
Kini sila ang otomatikong mamultahan sa libo hangtod 30-mil pesos nga monentary fine ug pahamtangan sa perpetual disqualification to hold office.
