CAGAYAN DE ORO CITY-Nabawian sa 20 gramos nga shabu,armas nga kalibre 45 ug drug paraphernalia ang usa ka opisyal sa Brgy Solona,Jasaan,Misamis Oriental kagahapong adlawa.
Giila ang dinakpan nga si Solona Brgy Kag Socrates Emmanuel Cuercuis,hingkod ang panuigon ug nagpuyo sa maong lungsod.
Gibutyag ni PDEA agent Ben Calibre nga gisikop si Cuercuis pinaagi sa drug buy bust operation diin nakuha kaniya ang balor P100-mil nga suspected shabu.
Gibutyag ni Calibre nga taud- taod na nga ila nga gipanid-an ang kalihukan ni Cuercuis ug hingpit nila nga nakuha kagahapong adlawa lamang.
Samtang nagdumili paghatag komento si Cuercuis sa dihang gihinabi kini sa Bombo Radyo sulod sa mini-cell sa PDEA-10.
Samtang gikalipay ni Gob Bambi Emano ang pagkasikop sa usa ka brgy kagawad nga suspek pagpayuhot sa ilegal nga droga diha sa Brgy Solona,Jasaan,Misamis Oriental.
Miingon si Emano nga dili na mabasol ni Cuercuis ang mga otoridad tungod kay dugay na sila nga nagpahimangno nga i-undang ang pagpakuyanap sa droga aron dili sila mangadakpan.
Gani,sulod ning bulana ipatawag na ang mga mayores,bise-mayores ug kapitanes aron ipaabot ang mensahe ni Pres Rodrigo Duterte batok kampanya sa droga ilabina nga pipila sa pinili nga opisyal ning lalawigan ang anaa sa listahan sa narcopolitics.
