CAGAYAN DE ORO CITY – Gikalipay sa presidente sa Liga ng mga Barangay sa Misamis Oriental ang sugyot ni Pres Rodrigo Duterte sa Kongreso nga i-oktaba ang May 2020 elections ug didto na sa Oktubre 2022.
Gibutyag ni Association of Brgy Council o ABC Federation President Board Member Leonard Winstanley nga apiki kaayo alang sa mga bag-ong napili nga brgy kapitan ang duha ka tuig nga pagserbisyo sa ilang mga lugar.
Gani, nagtoo si Winstanley nga daghang mga proyekto ang dili mahuman kon dili i-oktaba ang Brgy ug SK elections.
Samtang giangkon ni Association of Brgy Council o ABC Federation President Kapitan Kag Alam Lim nga ila nang gidahom nga ma-oktaba ang brgy elections sa Oktobre 2020. Siya miingon nga miduso sila’g resolusyon nga nag-hangyo nga himoon sa tuig 2022 ang piliay tungod kay mahimo kining dili patas sa mga bag-ong napili nga barangay kapitanes.Nagtoo si Lim nga dili makabawi ang mga midaug nga kapitan sa ilang naggasto sa eleksyon kon duha ka tuig lamang ang ilang pagserbisyo sa brgy. Una nang gioktaba ni Pres Rodrigo Duterte ang brgy elections niadtong Oktubre 2017.
