CAGAYAN DE ORO CITY-Gitawag sa Integrated Bar of the Philippines o IBP-Misamis Oriental-Cagayan de Oro Chapter nga ‘political circus’ ang impeachment case batok kang Pres. Rodrigo Duterte.
Lakip usab niini ang posibleng impeachment complaint nga ipasaka sa grupo ni Atty. Oliver Lozano batok kang Vice Pres. Leni Robredo.
Matud ni IBP-Misamis Oriental-Cagayan de Oro Chapter Pres. Atty. Ed Cuaresma nga pulos lamang kini mga pamulitika ug walay kaayohan nga idulot ngadto sa katawhang Pilipinhon.
Giaghat ni Cuaresma ang nalambigit nga mga grupo nga ipadaplin una ang pagpamulitika ug tutukan ang pagsulbad sa mga problema sa nasud ilabena sa ekonomiya ug territorial disputes.
Bisan ang Citizen’s Watch for Good Governance o CWGG region 10 ang nagtoong ‘premature’ pa ang planong pagpasaka’g kasong impeachment batok kang Robredo.
Miingon si CWGG convenor Atty. Antonio Soriano nga walay nakomiter nga ‘culpable violation of constitution’ si Robredo kon basihan ang video message nga iyang gipadala sa United Nations o UN nga nagsaway sa ‘war on drugs’ ni Duterte.
Dugang ni Soriano nga bisan ang impeachment complaint nga giduso sa Magdalo Group batok kang Duterte ang makonsiderar nga premature pa karong panahuna.
