CAGAYAN DE ORO CITY-Gihulatan karon sa PNP-10 ang guidelines gikan Camp Crame kabahin sa all out war batok illegal gambling activities nga naglihok sa rehiyon 10.
Kini human gimando ni PNP chief Dir Gen Ronald de la Rosa nga ipatuman gihapon sa kapolisan ug NBI ang Oplan Toktok Hangyo ngadto sa suspected illegal gambling operators ug financiers ayha ang lapad nga pagpangdakop.
Miingon si Cagayan de Oro City Police Office spokesperson C/Insp Mardy Hortillosa II nga naghinam-hinam na usab sila pagpatuman sa maong kamanduan batok pipila sa ilang kaubang pulis ug elected officials nga anaa sa illegal gambling operations dinhi sa syudad.
Samtang gihagit sa Misamis Oriental Cagayan de Oro Legal Lotto Agents Association Incorporated o MOCLAA ang liderato sa PNP ug NBI-10 nga isustiner ang ilang anti-illegal gambling operations hangtod mawala sa hingpit ang mga financier ug operator sa syudad ug lalawigan.
Kini samtang gikalipay nila ang mando ni Pres Rodrigo Duterte nga tinud-on na sa kapolisan kuyog ang NBI sa pagsumpo kontra illegal suwertres nga gipadagan ug gipaluhuyan sa pipila ka aktibo ug retired nga pulis ug sundalo sa lalawigan ug syudad.
Maoy gusto sa grupo nila ni Bana nga dili ‘ningas cogon’ o maayo lamang sa sinugdanan ang mga otoridad apan pakyas sa pag-sustenir sa kampanya.
Una nang gibulgar ni MOCLAAI President Astrid Bana nga anaa sa 30 ka elected officials sa syudad ug lalawigan ang direkta nga nalambigit sa illegal lotto outlets sa syudad.
