CAGAYAN DE ORO CITY – Nakatigom na ang local offices sa Commission on Elections o COMELEC sa libuang mga pirma sa mga tawo nga giingong suportado ang charter change o ChaCha pinaagi sa People’s Initiative o PI.
Gikompirma ni Misamis Oriental Provincial Election Supervisor Atty Carlito Ravelo nga anaa sa 41-mil ka pirma ang natigom sa distrito dos ug miapas usab ang district 1 sa syudad.
Miingon si Ravelo nga kutob pa lang sila sa pagdawat sa maong mga dokumento ug mogahin sa taas nga panahon sa pagsuta kon balido pa ang mga pirma nga nalatid niini.
Gawas sa syudad,may nakuha na usab sila nga mga pirma sa katawhan gikan sa lungsod sa Balingasag,Talisayan ug Initao sa lalawigan.
Samtang gipangandam na usab sa ahensiya ang pagpalik-rehistro alang sa mga residente nga gusto mahimong bag-ong mga botante sa 2025 elections sa nasud.
Miingon si Ravelo nga mosugod sila pagdawat sa probable voter applicants sa petsa 12 sa Pebrero hangtod Setyembre ning tuiga.
Siya miingon nga susama nga rekisitos lang gihapon ang angayang tumanon sa mga gusto ma-rehistro sa gihatag nila nga schedule.
Gawas niini,ipatuman usab dinhi sa syudad ang gitawag nga Register Anywhere Program o RAP nga gitumong alang sa taga-laing lugar nga gusto mag-update sa ilang voter’s record sa Comelec.
