CAGAYAN DE ORO CITY – Gikuyugan daw ni City Mayor Rolando ‘Klarex’ Uy ang katawhan pagpas-an sa krus aron matabangan sa pagpangita’g sulbad ug magaan-gaanan ang kabug-at sa gibati nila nga kahimtang.
Kini ang tipik sa mensahe nga gipalanog sa mayor sa pagbalaan sa mga mahal ng adlaw ning semana santa.
Miingon si Uy nga tipik sa gihingusgan nga direksyon niini sa iyang administrasyon mao ang pagpangita’ sa lahutay nga pagbaton sa lig-ong ekonomiya aron makahatag sa tingusbawan ug panginabuhian sa katawhan ning dakbayan.
Samtang dili angay kalimtang ang pina-katuyuan kon nganong nagpalasang ug nagpakamatay sa krus si Kristo Hesus.
Namahayag usab si kanhi City Mayor Oscar Moreno nga mahimong kawang ang pagkinabuhi sa katawhan kon wala niini masabti kon nganong gihimo ni Kristo ang dakong sakripisyo alang sa kalibutan.
Siya miingon nga unta gamiton sa katawhan kining higayon aron mas mapalig-on ang relasyon sa kahitas-an ug pakig-uli ngadto sa mga gikabangi sa dugay nang panahon
.Samtang makapalig-on pa unta sa relasyon tali sa mga tawo ug Ginoo kining kasamtangang pag-obserbar sa semana santa sa nasud ning tuiga.
Kini usab ang simpli nga pahayag ni Misamis Oriental 2nd District Cong. Bambi Emano samtang nakigduyog ang katawhan sa lalawigan sa Kristohanong pagbalaan ning mga mahal nga adlaw.
Siya miingon nga unta pagliwas sa semana santa,may epekto kini nga positibo sa tagsa-tagsa ka kinabuhi sa mga Kristiyano nga pinaka-rason kon nganong gidumdom ang pasyon,pagpasakit,kamatayon ug pagkabantaw ni Kristo.
Sila Moreno ug Klarex ang kanhi alyado apan kontra-politika na.
Samtang si Bambi ug Klarex nga nagka-deperensya sa politika dihang city mayor pa si late Vicente ‘Dongkoy’ Emano apan giingong nagkauliay na.
Sila usab si Emano ug Moreno ang kanhi alyado kaniadto apan nagkabulag ug nagka-kontra politika sa managlahi nila nga pagdagan sa pagka-gobernador sa lalawigan ug alkalde dinhi sa dakbayan.
