CAGAYAN DE ORO CITY – Giangkon ni Misamis Oriental Gov Bambi Emano nga adunay epekto sa pagpasira sa tanang mga gaming schemes sa Philippine Charity Statistics Office.
Gihupay sa gobernador ang gibating kabalaka sa publiko ilabina sa mga kabus sa posibilidad nga dili na sila makapangayo’g financial assistance sa maong ahensiya.
Si Emano miingon nga adunay laing paagi si Pres Rodrigo Duterte aron mapadayon ang pagtabang sa mga kabus.
Gani, siya nagtoo nga gitun-an na’g maayo sa presidente ang lakang nga e-terminate ang pagpadula sa Lotto STL games.
Samtang dili lamang mabalaka apan sabton una sa STL ug lotto outlet agent operators ang paglimpyo ni Pres Rodrigo Duterte sa grabeng kurapsyon sulod sa PCSO.
Kini ang pagpasabot ni acting City Mayor Girlie Balaba human gikadismaya pag-ayo sa legal STL ug lotto agents ang kalit pagpahunong sa mga padula sa PCSO epektibo sa miaging semana.
Namahayag si Balaba kinsa suod ni Duterte nga dili ra magdugay ang gihimong closure order ug makabalik kini sa normal nga operasyon.
Nasayran nga anaa sa libo ka lotto ug STL outlets ang naglihok sa syudad ug Misamis Oriental nga wala na makapadula gumikan sa kamanduan ni Duterte.
