CAGAYAN DE ORO CITY – Bisan si Assocation of Brgy Councils o ABC-Cagayan de Oro Federation President Kag Alam Lim ang dili maka-kompirmar kon dunay kapitanes nga nalambigit sa ilegal nga kalihukan sa KAPA Community Ministry International Incorporated sa syudad.
Kini bisan nga may mga nadawat na si Lim nga mga impormasyon nga daghan ang nag-apil apan bisan unsa walay misang-at sa reklamo batok sa KAPA.
Miingon si Lim nga lisod na ra ba nga makuha ang salapi nga gipasulod sa investors sa KAPA kay gipaagi kini sa donasyon.
Una niini,may mga report nga pipila ka brgy officials sa syudad ang investors sa maong grupo.
Samtang tukion sa Association of Brgy Councils o ABC-Misamis Oriental ang pagkuyanap sa kalihukang ilegal sa KAPA Community Ministry International Incorporated.
Kini aron sa pagsuta kon may brgy kapitanes ba nga nalambigit sa KAPA investment scam.
Gihimo ni ABC-Misamis Oriental Federation president ug Sangguniang Panlalawigan board member Leonard Stanley ang pahayag tungod sa pagka-igo sa probinsya sa ilegal nga kalihukan sa KAPA.
Miingon si Winstanley nga kabahin ang pagtuki sa KAPA scam sa gitakdang tigom sa 444 ka brgy kapitanes sa lalawigan ning semanaha.
Dumduman nga kabahin ang Misamis Oriental nga naronda sa NBI-10 ug SEC-10 tungod sa operasyon sa KAPA sa lungsod sa Opol sa miaging semana.
