CAGAYAN DE ORO CITY – Gitin-aw ni Misamis Oriental Provincial Tourism Officer Atty Jeffrey Saclot nga dili na kinahanglang mo-resign isip empleyado sa kapitolyo-probinsiyal si Ms Cagayan de Oro 2019 Cindy Obeñita.
Si Saclot miingon nga dili makaapekto sa trabaho ni Cindy ang bag-ong responsibilidad dinhi sa syudad.
Siya miingon nga nalipay sila tungod kay dako’g ikatabang si Obeñita promotion sa turismo sa Misamis Oriental human siya makoronahan isip bag-ong Ms Cagayan de Oro.
Gani, suportado ni Misamis Oriental Gov Bambi Emano ang kadaugan ni Obeñita ug andam suportahan niini ang iyang kampaniya nga mapakigbatukan ang cervical cancer.
Samtang bisan Cagayan de Oro City Tourism Promotions Officer Eileen San Juan ang nagbutyag nga dili na kinahanglan pa nga mo-resign isip empleyado sa kapitolyo-probinsiyal si Obeñita.
Sumala ni San Juan nga dili na kinahanglan pang padak-on ang isyu sa kadaugan ni Obeñita ilabina nga lumad kini nga taga-Cagayan de Oro taliwala nga nagtrabaho kini sa kapitolyo-probinsiyal.
Siya miingon nga walay problema kanila kon diin nagtrabaho si Obeñita kay maoy mahinungdanon nga nasayod siya sa iyang responsibilidad.
Nanghinaut na lamang si San Juan nga mahimo sa batan-ong beauty queen ang pag-promotar sa turismo sa syudad ug magsilbing maayong ehemplo sa kabatan-unan.
