CAGAYAN DE ORO CITY – Hinay-hinay nang nabati sa provincial govt ang epekto sa pagpugong sa korte nga magamit ang pondo pagtunol serbisyo sa katawhan sa lalawigan.
Kini ang gikompirmar ni Gov Bambi Emano diin ubay-ubay sa mga serbisyo na sa kapitolyo ang napasa nila sa laing govt agencies tungod sa temporary restraining order sa korte sa ilang pondo.
Miingon si Emano nga samtang dili pa maresolbar ang kaso sa korte,pabiling dili usab nila magamit ang tipik sa 3.5 bilyon pesos nga pondo ning tuiga.
Samtang gitawag nga ‘drama’ ni City Mayor Oscar Moreno ang gipatoo ni Emano nga wala na’y pondo nga magamit ang probinsya kay gidid-an una sa korte.
Miingon si Moreno nga daan nang ilegal ang paghimo sa 2020 provincial budget hinungdan nga dili na angayang maghimo pa’g eksena si Emano sa gimando sa korte.
Namahayag ang mayor nga kon wala pa nagpagalong ang mayoriya kaniadto ni kanhi Board Member President Elipe,dili magka-problema si Emano kabahin sa gikuwestiyon nga pondo sa iyang administrasyon.
