CAGAYAN DE ORO CITY – Gisumbalika’g kuwestiyon ni Gov Bambi Emano ang katukuran sa minilyong balor monyumento sa press freedom ug Misamis Oriental Heritage sulod sa parke sa kapitolyo probinsyal.
Kini human unang gipangita’g building permit ni kanhi gobernador ug karon City Mayor Oscar Moreno ang katukuran sa bag-ong provincial tourism office sulod sa parke.
Miingon si Emano nga kon dunay mapakita si Moreno nga permit sa katukuran sa maong mga istraktura,mismo kini ang mangunay pagkuha’g permit ug mobayad sa penalty sa city hall ning syudad.
Samtang gitambagan ni Moreno nga mangunsulta una si Emano sa iyang mga abogado diha sa kapitolyo probinsyal.
Kini human pangita-i sa gobernador si Moreno sa building permits sa duha ka edepisyo nga natukod sa capitol park.
Miingon si Moreno nga dili gambalay apan kabahin lamang sa parke ang press freedom ug Misamis Oriental Heritage monuments,rason wala na’y permiso nga angay kuhaon niini gikan sa dakbayan.
Unang gi-kuwestiyon ni Moreno kon nganong walay permit ang pagtukod ni Emano sa provincial tourism office sulod sa provincial capitol park.
