CAGAYAN DE ORO CITY – Subli naukay ang isyu sa giingong nagka-gidlay nga kahimtang sa walo ka provincial hospitals sa Misamis Oriental.
Kini human gituki ni City Mayor Oscar Moreno ang maong hisgutanan tungod usab sa pagdala’g sulat ni Gov Bambi Emano kang Pres Rodrigo Duterte diin naghangyo nga ipaubos sa enhanced community quarantine ang lalawigan tungod sa local transmission sa COVID-19 dinhi sa syudad.
Miingon ang mayor nga daw nag-antos ang katawhan sa serbisyong medikal kay wala hatagi’g igong pagtagad sa gobernador ang panginahanglan sa mga opsital sa lalawigan.
Samtang dili na lamang tumpangan ni Emano ang batikos ni Moreno kon unsa ang kalainan sa ilang pagdumala sa walo ka provincial hospitals sa lalawigan.
Gitambagan na lamang sa gobernador ang mayor nga mismo ang chief of hospitals ang angay pangutan-on kon unsa ang kalainan sa ilang pagdumala kaniadto ug sa kasamtangang administrasyon.
Gani,gitumbok ni Emano ang OWWA Hospital sa Alubijid ning lalawigan nga maglisod pagkuha’g lisensya sa DoH tungod sa giingong pagka-substandard nga pagkahimo niini.
